НҰР-СҰЛТАН, 7 желтоқсан – Sputnik. Қазақстанның бас мемлекеттік санитар дәрігері Ерлан Қиясов коронавирустың таралуына жол бермеу туралы қаулысына өзгеріс енгізді, деп хабарлайды Sputnik Қазақстан.
Жаңа қаулыға сәйкес, Қазақстанға шетелден келетін барлық жолаушы ПТР-тест теріс нәтижесі бар анықтаманы көрсетуі тиіс. Бұған дейін ондай талап әуе рейстерінде ғана болған. Енді, теміржол мен теңіз қатынасымен, сондай-ақ, автобекеттер арқылы шекарадан өткен адамдар да ПТР-тест анықтамасын алып жүруге міндетті болады. Анықтаманың мерзімі – 3 күн. Дегенмен, кейбір санаттағы адамдар тест нәтижесін көрсету міндетінен босатылған. Олар:
- 5 жасқа дейінгі балалар;
- Қазақстан Республикасының үкіметтік делегациялары;
- локомотив бригадаларының мүшелері;
- теміржол, теңіз және өзен көлігіндегі тасымалдау қызметімен байланысты адамдар;
- әуе компанияларының экипажы.
Бұдан бөлек, бас мемлекеттік санитар дәрігер перзентханада босану кезінде көмекші адамның кіруіне рұқсат берді. Алайда оның 3 тәуліктен аспаған ПТР-тест анықтамасы болуы шарт.
Айта кетсек, өткен тәулікте елде 712 адам COVID-19 жұқтырды. Жалпы пандемия басталғалы 136 983 тұрғын індетке шалдықты.
