АЛМАТЫ, 5 қазан – Sputnik. Алматыда коронавирус жұқтырған науқастарға арналған жаңа модульдік аурухана ашылды. Ол Қалқаман шағын ауданында Aport ойын-сауық кешені жанында орналасқан, деп хабарлады Sputnik Қазақстан тілшісі.
Аурухана 12 бөлімнен тұрады. Ішінде мельцер бокстары, палаталар, қабылдау-диагностикалық және жан сақтау бөлімшелері, зертхана, асхана және кір жуатын бөлім бар.
Сонымен қатар аурухана аумағында медициналық газдар станциясы, жергілікті тазарту құрылғылары, жедел жәрдем көліктерін дезинфекциялауға арналған жолбөгегіш және медициналық қалдықтарды жоюға арналған блок орналасқан.
Сонымен қатар аурухана аумағында балалар қалалық клиникалық жұқпалы аурулар ауруханасының филиалы салынды.
"Қалада балалар ауруханасы 700 мың тұрғынға есептелген. Қазір бұл көрсеткіш екі миллионнан асты. Сол себепті осы жерде инфекциялық патологиясы бар балаларға арналған филиал ашылды", - деді Ержан Сералин.
Стационарда 322 медицина қызметкері жұмыс істейді. Оның бір бөлігі балалар жұқпалы аурулар стационарында қызмет етеді. Қалған дәрігерлер тағылымдамадан өтеді, олар қаладағы түрлі медициналық мекемелерге жіберіледі.
Оқи отырыңыз: Коронавирустың екінші толқынына дайындалып жатырмыз – министр Цой
Аурухананың тағы бір жаңалығы ретінде пациенттердің интерактивті картасын атауға болады.
"Дәрігерлер кабинетінде монитор орнатылған, онда пациенттердің жағдайы туралы барлық өзекті ақпарат көрініп тұрады. Жүйе қанша науқас бар екенін, қай блокта ем алып жатқанын, қанша адамның ауыр, аса ауыр хәлде жатқанын көрсетеді. Демек енді дәрігер науқастардың жағдайын білу үшін әр палатаға жүгірмейді", - деді Сералин.
Аурухана бір уақытта 300-ге дейін науқасты қабылдай алады.
Айта кетейік, қаладағы екінші модульді аурухана екі айдың ішінде салынды. Өткен аптада оны Алматы әкімі Бақытжан Сағынтаев тексеріп шықты. Аурухана науқастарды келесі аптадан бастап қабылдайды.
