НҰР-СҰЛТАН, 25 қыркүйек – Sputnik. Өскемен қаласының әкімдігі өз қызметкерлерінің жетім балаларға берілуі тиіс тұрғын үйлерде тұратындығын жоққа шығарды, деп хабарлайды YK-news.kz басылымы.
Бұған дейін әкімдіктің тұрғын үй қатынастары бөлімінің мамандары мен полиция қызметкерлері және КСК өкілдерінен құралған арнайы комиссия 102 пәтерді тексеріп, бірқатар заң бұзушылықтарды анықтағаны БАҚ беттерінде жарияланған болатын. Ол жерде Өскемен қаласы әкімдігінің қызметкерлері тұратыны айтылған.
Осыдан кейін "Үміт" балалар үйінің қызметкерлері жағдайдың жай-жапсарын түсіндірді.
"Бала бізге төрт жасында келгенде, оны бірден жасы 18-ге толғанда өзіне тиесілі болатын баспана кезегіне қойдық. Енді біз сол кезек арқылы берілетін пәтерден бас тарта алмаймыз. Олай істесек, кейін ол түпкілікті баспанасыз қалуы мүмкін. Жетім балалар мен ата-ана қамқорлығынсыз қалған балалар үйінің ережесіне сәйкес, оны үшінші тұлғаға жалға беруге құқығымыз бар. Солай жасадық та", – дейді "Үміт" балалар үйінің әлеуметтік педагогы Қарлығаш Құсайынова.
Сонымен қатар, ол тұрғын үйді жалға бергенде жалдаушының жұмыс орнын айқындауға құқылы емес екенін түсіндірді.
Ал ол жерде уақытша тұрған азаматтар тұрғын үй алаңының жалдау ақысы мен коммуналдық қызмет ақысын төлеп тұрады. Сонымен қатар, балалар үйінің жетекшілері ата-ана қамқорлығынсыз қалған және оның жылжымайтын мүлкін мемлекет есебінен алған баланың есепшотына ай сайын 20 000 теңге аударып туруға міндеттеледі.
"Пәтерді үшінші тұлғалардың жалдау фактісі бойынша "Үміт" балалар үйі қызметтік тексеріс жүргізді. Оның қорытындысы бойынша бұл пәтерді жалдап тұрған адам Өскемен қаласы әкімдігінің қызметкері емес екендігі белгілі болды", – дейді Өскемен қаласының тұрғын үй қатынастары бөлімінің бастығы Фархат Жілібаев.
