НҰР-СҰЛТАН, 7 тамыз – Sputnik. Сыбайлас жемқорлыққа қарсы іс-қимыл агенттігі Қостанай әкімдігінде істейтін тағы бірқатар лауазымды тұлғаға қатысты сотқа дейінгі тергеудің басталғанын мәлімдеді, деп хабарлайды Sputnik Қазақстан тілшісі.
Ресми мәліметке сәйкес, жер қатынастары бөлімінің лауазымды тұлғалары қызмет бабын асыра пайдаланған. Олар 37 084 336 теңге тұратын жер учаскесінің бағасын 4 524 607 теңгеге дейін төмендетіп, арзан бағаға жер учаскесін жалға алу құқығын сату бойынша заңсыз аукцион өткізді деген күдік бар. Осылайша, бір кәсіпкерге жағдай жасаған. Ал мемлекетке келген шығынның көлемі 32 107 268 теңге.
Әкімдіктің бір топ қызметі дүкен құрылысына арналған жер учаскесінің нысаналы мақсатын заңсыз өзгертіп, сәулет-жоспарлау тапсырмасын жасағаны үшін айыпталған болатын. Ал 23 шілде күні Қостанай қаласы әкімінің өкімімен тергеуде жүрген Қостанай қаласы әкімінің орынбасары Финк қызметінен босатылған болатын.
"Егер оның кінәсі сотта дәлелденсе, онда 10 күнтізбелік күн ішінде қала әкімі отставкаға кетуі тиіс", - дейді агенттіктің аға тергеушісі Данияр Биғайдаров.
