НҰР-СҰЛТАН, 16 шілде – Sputnik. Денсаулық сақтау министрлігі карантин талаптарын бұзу оқиғалары бойынша есеп берді, деп хабарлайды Sputnik Қазақстан тілшісі.
Тауарлар мен көрсетілетін қызметтердің сапасы мен қауіпсіздігін бақылау комитетінің төрағасы Тимур Сұлтанғазиевтың айтуынша, 5-14 шілде аралығында бақылаушылар 16 572 нысанды тексеріп шыққан. Соның ішінде 1 617 нысанда тәртіп бұзушылықтар анықталған.
"564 нысан жұмысын өз еркімен тоқтатты. Әкімшілік құқық бұзушылық кодексінің 425-бабы бойынша 225 хаттама рәсімделді. Ескерту жасалып, айыппұл салынды", - деді Сұлтанғазиев онлайн брифингте.
Ол жабық нысандарда тұрғындар бетперде тақпайтынын, қашықтықты сақтамайтынын атап өтті, кебірінде арнайы белгілер орнатылмаған, дене қызуын өлшемейді, дезинфекция жасалмайды.
Мәселен, Ақмола облысында карантинге қарамастан, аумағы 500 шаршы метрден асатын дүкен істеп тұрған. Оның иесіне 638 мың теңге көлемінде айыппұл салынды.
Оқи отырыңыз: Енді той өткізгендер де, тойға барғандар да айыппұл төлейді
"Ал Қостанай облысындағы нысандардың бірінің қызметкерлері бетперде де, қолғап та кимей жүрген. Антисептик қойылмаған. Сол сияқты Семейде сауда үйі мен базарға айыппұл салынды. Сосын қазақстандықтар банкет ұйымдастыруды қоятын емес. Алматыда бір жерде 30 адамдық банкет анықталса, тағы бір мейрамханада 100 адам қатысқан үйлену тойы анықталды. Ондай жағдайлар аз емес", - деп атап көрсетті Сұлтанғазиев.
Әкімшілік құқық бұзушылық кодексінің 425-бабы ("халықтың санитариялық-эпидемиологиялық саладағы заңнама талабын бұзу") бойынша қомақты айыппұл қарастырылған:
- жеке тұлғаларға –30 АЕК (83 340 теңге);
- лауазымды тұлғалар, шағын кәсіпкерлік нысандар мен коммерциялық ұйымдарға – 230 АЕК (638 940 теңге);
- орта кәсіпкерлік нысандарға – 310 АЕК (861 180 теңге);
- ірі кәсіпкерлік нысандарға – 1 600 АЕК (7 500 600 теңге).
