НҰР-СҰЛТАН, 13 шілде – Sputnik. Ақмола облысында Ұлттық ұлан медицина қызметінің майоры Маратхан Ардан қайтыс болды.
Ұлттық ұланның баспасөз қызметі Sputnik Қазақстан тілшісіне әскери қызметші Көкшетауда істегенін айтты. Ол коронавирус салдарынан болған екіжақты пневмониядан көз жұмған.
"Ұлттық ұлан медицина қызметінің майоры Ардан Маратханның мезгілсіз дүниеден өтуіне байланысты жақындарына көңіл айтады", - деді ведомствоның баспасөз қызметі.
13 шілдедегі ақпаратқа сәйкес, Қазақстанда 59 899 адам коронавирус жұқтырған.
8 шілде күні президент Қасым-Жомарт Тоқаев 13 шілде COVID-19 пандемиясынан көз жұмғандарды ұлттық аза тұту күні болатынын жариялады.
12.00-де бүкіл Қазақстанда бір минут үнсіздік жарияланды.
Президент Қасым-Жомарт Тоқаев пен лауазымды тұлғалар Ақорданың алдында коронавирус пандемиясы құрбандарын еске алды.
