ПАВЛОДАР, 8 маусым – Sputnik. Екібастұзда салынып жатқан нысанда жұмысшы биіктіктен құлап кетті, деп хабарлады Sputnik Қазақстан тілшісіне Павлодар облысы еңбек басқармасының басшысы Асқар Қапанов.
Қапановтың мәліметінше, 40 жастағы ағаш ұстасы-бетоншы стационарлық баспалдақпен көтеріліп, шамамен 6-7 метр биіктіктен құлаған.
"1980 жылы туған ер адамға мойын омыртқасы жарақаттанған және омыртқа жотасы қысылып сынған деген алдын ала диагноз қойылды", - деді басқарма басшысы.
Қазіргі уақытта еңбек инспекторлары жазатайым оқиғаның мән-жайын тексеруге кірісті, деп хабарлады ведомство.
