АЛМАТЫ, 30 сәуір –Sputnik. Қызылордада төтенше жағдай кезінде ауызашар ұйымдастырғандар жауапкершілікке тартылды, деп хабарлады Polisia.kz порталы.
26 сәуірде Қызылорда тұрғыны үйінде ауызашар беріп, қаланың әр түпкірінде тұратын достарын шақырған. Олар кешкі астан кейін кездесуді моншада жалғастырады.
"Қазақстан Республикасы әкімшілік құқықбұзушылықтар туралы кодексінің 476-бабына сәйкес (төтеншежағдай режимiн бұзу), тәртіп бұзған бес азаматқа қатысты әкімшілік хаттама толтырылды. Іс құжаттары сотқа жолданды. Сот шешімімен тәртіп бұзушыларға айыппұл салынды", - делінген ақпаратта.
Сонымен қатар, тәртіп сақшылары қоғамдық тәртіп пен азаматтардың қауіпсіздігін қамтамасыз ету мақсатында қолға алынған шараларға қарамастан төтенше жағдай режимін бұзушылардың азаймай отырғанын айтты.
