НҰР-СҰЛТАН, 21 сәуір – Sputnik. Қазақстан мұсылмандары діни басқармасының төрағасы, бас мүфти Наурызбай қажы Тағанұлы ауызашар тағамын мешіттер арқылы таратуға шақырды, деп хабарлайды Sputnik Қазақстан тілшісі.
"Ауыз бекіткен жандарға азық-түлік жеткізіп берсеңіз де, ауыз аштырғанның сауабын аласыз. Тіпті, көмекке мұқтаж отбасыларға ауызашарға кететін шығынды беріп, қаржылай қолдау көрсетсеңіз де, мол сауапқа кенелесіз. Осы ретте барша отандастарымды көмекке мұқтаж отбасыларға жан-жақты қолдау көрсетуге, еліміздегі мешіттер арқылы ораза тұтқан отандастарымызға ауызашар тағамдар таратуға шақырамын", - деді Тағанұлы бүгінгі онлайн брифингте.
Осы орайда бас мүфти "Бақара" сүресінің 148-шы аятын еске алды. Ол жерде "Әркімнің бір бет алатын құбыласы бар" деп жазылған. Бұдан бөлек, Алланың елшісі: "Кімде-кім бауырының қажетін өтесе, Алла оның қажетінде болады. Кімде-кім мұсылманның бір қайғысын сейілтсе, Алла оның қайғы-қасіреттерінің бірін сейілтеді", - деді бас мүфти.
Тағы оқыңыз: Бас мүфти жамағатқа: осындай шешім қабылдауға мәжбүр болдық
Ол "қайырымдылық жасасаң, қайырын өзің көресің" деген халық даналығын да еске салды.
"Садақа пенденің мал-дәулетін азайтпайды, керісінше, берекесін арттырады. Біз берген садақа бір отбасын қуанышқа бөлейді. Ендеше, көмекке зәру шаңырақты шаттыққа бөлеп, үлкеннің батасын алып, алғысына бөленейік", - деп атап көрсетті Тағанұлы.
