НҰР-СҰЛТАН, 24 наурыз – Sputnik. Алматыда 70 жастан асқан қарияларға зейнетақыны үйге жеткізетін болады. Бұл туралы қала әкімінің орынбасары Сапарбек Тұяқбаев мәлім етті, деп хабарлайды Sputnik Қазақстан тілшісі.
Бұған дейін "Қазпошта" АҚ арқылы 80-нен асқан қала тұрғындарына зейнетақаны үйге жеткізу қызметі болған. Енді, карантинге байланысты осы қызметті 70 жастан асқан зейнеткерлерге де көрсету жоспарланып отыр.
"Қазіргі кезде 70-тен асқан зейнеткерлердің тізімі жасалып жатыр. Біздің негізгі мақсатымыз – барынша көп адамды қамту. Сонда олар үйде отырады, зейнетақы алу үшін қалаға шықпайды, банкке бармайды. Адам көп жүретін жерде отырмайды. Бұдан да басқа бастамалар болады. Біз онымен шектелмейміз", - деді Тұяқбаев бүгінгі брифингте.
Оның айтуынша, Алматыда 230 мың зейнеткер тұрады.
16 наурызда коронавирусқа байланысты Қазақстанда төтенше жағдай режимі жарияланған болатын. Ал 19 наурыздан бастап Нұр-Сұлтан мен Алматыда карантин енгізілді.
Соңғы мәліметтер бойынша Қазақстанда коронавирус дертіне шалдыққандар саны 68 адамға жетті. Оның 35-і Нұр-Сұлтанда, 29-ы Алматыда, 2-і Қарағандыда, 1-і Алматы облысында және 1 жағдай Ақтөбе облысында тіркелген.
Тағы оқыңыз: Алматыда азық-түлік пакеттері таратыла бастады
