НҰР-СҰЛТАН, 9 ақпан – Sputnik. Президент Қасым-Жомарт Тоқаев Қордайдағы қақтығыс кімнің кесірінен болғанын айтты. Ол өзінің Twitter-дегі парақшасында жазба жариялады.
"Мемлекеттік органдар қызметкерлерінің салғырттығы арқасында арандатушылар қантөгіс жасады. Олар жазаланады. Мемлекет зардап шеккендерге қолдау көрсетеді. Бейбітшілік пен келісім біздің басты байлығымыз, оны бұзуға ешкімнің құқығы жоқ!", -деп жазды президент.
Қордайдағы оқиға
7 ақпанда кешкі сағат 19:00-де Жамбыл облыстық полиция департаментіне "Қордай ауданының Масанчи ауылының жанында 70-тен астам адам төбелесіп жатыр" деген ақпарат түскен. Заңсыз әрекеттерді тоқтату үшін дереу полиция қызметкерлері жіберіледі. Сол жерде болған адамдар төбелесті видеоға түсіріп, әлеуеметтік желі арқылы таратқан.
Арнайы құрылған штаб өкілдері қақтығыс салдарынан 10 адам қаза болғанын хабарлады.
2020 жылдың 8 ақпаны сағат 21:00-ден бастап Жамбыл облысы Қордай ауданы аумағында жергілікті ауқымдағы төтенше жағдай жарияланды.
