Қоғам

Қазақтың ғұлама ғалымы өмірден озды

© Sputnik / Абзал КалиевСловарь
Словарь - Sputnik Қазақстан
Жазылу
Бүгін Халықаралық қазақ тілі қоғамының президенті, ғұлама ғалым, академик Өмірзақ Айтбайұлы 83 жасында дүниеден өтті

НҰР-СҰЛТАН, 9 қаңтар – Sputnik. Қазақстан Республикасы Ұлттық ғылым академиясының академигі, Халықаралық қазақ тілі қоғамының президенті Өмірзақ Айтбайұлы қайтыс болды. Бұл туралы "Егемен Қазақстан" республикалық газеті" АҚ басқарма басшысы Дархан Қыдырәлі өзінің әлеуметтік парақшасында жазды, деп хабарлайды Sputnik Қазақстан тілшісі.

"Бес күн жалған" деген. Бүгін Халықаралық қазақ тілі қоғамының президенті, саналы ғұмырын ана тілін ардақтауға арнаған ғұлама ғалым, академик Өмірзақ аға Айтбайұлы өмірден озыпты", - деп жазды Қыдырәлі.

Оның айтуынша, Өмірзақ Айтбайұлы еңбек жолын "Социалистік Қазақстан" газетінен бастаған. 

"Қазақ тіліне қатысты мақалаларын да үзбей жіберіп тұратын. Кешегі сал-серілердің сарқытындай әнші, шешен, сыр-сымбаты да келіскен кісі еді. Жатқан жері жарық болсын, рухы пейіштің төрінде шалқысын! Туған-туыстарына, жақындары мен шәкірттеріне қайғырып көңіл айтамын", - деді Дархан Қыдырәлі. 

Өмірзақ Айтбайұлының өмірбаяны

Өмірзақ Айтбайұлы 1936 жылы 5 сәуірде Түркістан облысы Отырар ауданы Балтакөл ауылында дүниеге келген.

1959 жылы Әл-Фараби атындағы Қазақ ұлттық университетінің (бұрынғы Киров атындағы ҚМИ) филология факультетін бітірді.

1971 жылы "М.Горький фразеологизмдерінің қазақ тілінде берілу жолдары" тақырыбында кандидаттық диссертация қорғады.

  • 1959 – 1962 жылдары республикалық "Социалистік Қазақстан" газетінің əдеби қызметкері;
  • 1962 – 1974 жылдары Қазақ ССР ҒА Тіл білімі институтының кіші ғылыми қызметкері;
  • 1974 – 1981 жылдары аға ғылыми қызметкер;
  • 1981 – 1989 жылдары "Терминология мен аударма теориясы" бөлімінің меңгерушісі;
  • 1973 жылдан – "Ғылыми терминологиялық орталық" директоры;
  • 1989 жылдан – республикалық "Қазақ тілі" қоғамының вице-президенті;
  • 2004 жылдан – Халықаралық қазақ тілі қоғамының президенті.

Академик Өмірзақ Айтбайұлы "Құрмет" және "Парасат" ордендерімен марапатталған.

2013 жылы Еуропа ғылыми-өнеркəсіптік палатасының шешімімен лингвистикаға қосқан үлесі үшін оған арнайы диплом мен алтын медаль табысталған.

Жаңалықтар
0