НҰР-СҰЛТАН, 5 қаңтар — Sputnik. Алматы тұрғын үй кешендерінің бірінінің күзетшісі ерлі-зайыптыны соққыға жықты деген күдікке ілінді. Ақпаратты қалалық полиция департаменті растады.
Оқыс оқиға 2020 жылдың 1 қаңтарында таңғы сағат 6-да Тілендиев көшесінде орналасқан "Жағалау" тұрғын үй кешенінде болған.
Полиция департаментінің мәліметінше, 24 жастағы ер адам 12-қабатта Т. есімді азамат пен оның әйелінің денесіне зақым келтірген.
"Осы күні күдіктінің үстінен Қазақстан Қылмыстық кодексінің 107-бабы (Денсаулыққа қасақана ауырлығы орташа зиян келтiру) бойынша сотқа дейінгі тергеу басталды", - делінген қалалық полиция департаменті таратқан хабарламада.
Қазіргі таңда Алмалы аудандық полиция басқармасының қызметкерлері оқиғаның мән-жайын анықтап жатыр.
"Тиісті сот-медициналық сараптама тағайындалды. Оның қорытындысына сәйкес, тиісті процессуалдық шешім қабылданады", - делінген хабарламада.
Айта кетейік, зардап шеккен келіншектің әпкесі әлеуметтік желіде күйеу баласының қазір ауруханада жатқанын, ал туысы емшектегі баласының болуына байланысты ауруханаға жатудан бас тартқанын жазды.
