НҰР-СҰЛТАН, 31 желтоқсан – Sputnik. Алматы түбінде апатқа ұшыраған Bek Air ұшағында Маңғыстау облысы Қарақия ауданындағы Құрық ауылының 17 жастағы тұрғыны Зухра Айболатова да болды. Қыз апат болған сәтте қандай эмоцияны бастан кешкенін Instagram-дағы парақшасында жазды, деп хабарлайды инАктау.
Зухра Алматы академиясында оқиды. Ол Жаңа жыл мерекесі қарсаңында Нұр-Сұлтандағы екі әпкесінің үйіне қонаққа баруды ұйғарған.
"Басында бәрі жақсы болды. Бәріміз ұшаққа отырдық, жақын арада жақындарымызды көретінімізге қатты қуандық. Ұшар алдында әкеме қоңырау шалып, жағдайым жақсы екенін айттым. Әкем рейс алдындағы түнде қатты уайымдады, өйткені ұшаққа өмірімде алғаш рет отырдым. Ұшақ қозғалғаннан кейін дірілдей бастады. Алдымен ешкім ештеңе түсінбеді, ұшақ екі рет төмен түсті, содан кейін көтеріліп, құлады", - деп жазды студент.
Оның айтуынша, ұшақ құлаған кезде және одан кейін әуе кемесінің ішінде не болғанын сөзбен айтып жеткізу қиын.
"Осы 10-15 секунд ішінде менің бүкіл өмірім көз алдымнан өте шықты. Қазір ғана бәрі күліп, сөйлесіп жатқан еді – лезде айғай-шуға айналып кетті. Қасымдағы адамдар жылап жатыр, көбісі жарақат алған, айналада ұшақтың сынықтары мен заттар шашылып жатты. Ата-аналар алаңдап, балаларын шақырды, не істеу керектігін ешкім білмеді. Есімді жиғанымда үйіндінің астында қалғанымды түсіндім. Одан шығып, қасымда ер адамның жатқанын көрдім. Оның аяғы сынып кетіпті, сүйектері шығып тұрды. Жедел жәрдем келгенге дейін оған көмектесе тұрайын деп ойладым. Шамамен 40 минут қасында болдым, содан кейін ол маған өзіңді құтқар деді", - деп еске алды қыз.
Апаттан кейін Зухра ауруханаға жеткізілді. Оған табаны жарылған деген диагноз қойылыпты, өміріне еш қауіп жоқ.
"Аман екенімді айтайын десем, неліктен екенін білмеймін, ата-анамның нөмірін есіме түсіре алмадым. Сондықтан әлеуметтік желі арқылы құрбыма жағдайым жақсы екенін айт деп хат жаздым. Ата-анам білгенде есеңгіреп қалды, олар мені қатты уайымдапты", - дейді қыз.
Адамдардың өмірін қиған трагедия Зухраның жан дүниесінде із қалдырды.
"Осы оқиғадан кейін ұшуға іштей қорқыныш пайда болды, оның үстіне бұл алғаш рет ұшуым еді, осылай болды. Бір-екі күнде мені ауруханадан шығарады. Каникулды Маңғыстауда ата-анаммен өткіземін деп отырмын. Әуе апатына қарамастан үйге ұшақпен бармақшымын" - деді қыз.
Зардап шегушінің үлкен әпкесі Гүлдана Елсанова "Ладаға" Зухрамен бірге ауруханада жатқанын айтты.
Алматыдағы трагедия
Ұшақ апаты 27 желтоқсан таңғы сағат жетіде болды. Bek Air әуе компаниясының "Алматы – Нұр-Сұлтан" бағытындағы Fokker 100 ұшағы Алматы маңына құлады.
Ұшақта 93 жолаушы мен 5 экипаж мүшесі болған. Апат 12 адамның өмірін қиды, қаза болғандардың ішінде ұшақ командирі бар. Екінші ұшқыш ауруханада жансақтау бөлімінде жатыр.
Тағы оқыңыз: Ұшақ апатынан қаза болғандардың отбасына өтемақы қалай төленеді
Қазір 46 пациент ауруханада, оның тоғызы – бала. Денсаулық сақтау минстрлігі балалардың өміріне ешқандай қауіп төніп тұрмағанын айтты. Тоғыз адамның жағдайы әлі ауыр.
Ішкі істер министрлігі әуе апатына себеп болған үш жағдайды атады. Олар: экипаж қателігі, техникалық ақау және навигациялық қызмет жұмысы.
Ұшақтың қара жәшігі Мәскеудегі мемлекетаралық авиация комитетіне тапсырылды. Тергеудің алдын ала қорытындысы 10 қаңтарға дейін жарияланбақ.
Президент тапсырмасымен премьер-министр жетекшілік ететін комиссия құрылды. Тоқаев апаттың себебін анықтап, кінәлілерді қатаң жазалауды тапсырды. 28 желтоқсан елімізде жалпыұлттық аза тұту күні болып жарияланды.
