НҰР-СҰЛТАН, 18 желтоқсан – Sputnik. Елорданың әкімі Алтай Көлгінов қалада Тәуелсіздік күні өткен митингке қатысты пікір білдірді, деп хабарлайды Sputnik Қазақстан тілшісі.
"Бізде ДВК-ға* (Қазақстанның демократиялық таңдауы - Sputnik Қазақстан) заң бойынша тыйым салынған. Сіздер оны жақсы білесіздер. Сондықтан бұл заңсыз митинг болды. Оның белсенділері әкімдікке митинг өткізуге өтініш хат жолдаған жоқ. Бұдан артық ештеңе айта алмаймын", - деді Көлгінов астанада өткен баспасөз мәслихатында.
Айта кетейік, бұған дейін ішкі істер министрілігі 16 желтоқсан - Тәуелсіздік күні рұқсат етілмеген акциялардың 55 қатысушысы ұсталғанын хабарлаған.
"16 желтоқсан күні Нұр-Сұлтан және Алматы қалаларында рұқсат етілмеген митингілер ұйымдастырылды. Бас прокуратураның ескертуіне қарамастан, кейбір азаматтар арандатушылыққа ұшырап, заңсыз акцияларға қатысты. Қатысушылар билік органдарының заңсыз әрекеттерді тоқтату туралы талаптарын орындамағандықтан, Нұр-Сұлтан қаласында 32 адам, Алматы қаласына 23 адам полицияға жеткізілді", - делінген салалық ведомство мәліметінде.
Ресми ақпарат бойынша Нұр-Сұлтанда ондаған азамат Республика даңғылы мен Абай көшесінің қиылысында жиналып, рұқсат етілмеген митинг өткізді.
*Қазақстанның демократиялық таңдауы (ДВК) – Қазақстанда тыйым салынған экстремистік ұйым.
