НҰР-СҰЛТАН, 5 желтоқсан – Sputnik. Қостанай облысының әкімі Архимед Мұхамбетов өз жалақысының көлемін жариялады, деп хабарлайды Sputnik Қазақстан тілшісі.
"Ол құпия емес. Менің жалақым барлық алым-салықпен қоса шамамен 762 000 теңгеге жетеді. Ал үйдің коммуналдық шығындары үшін айына 40 мың теңгедей төлеймін", - деді Мұхамбетов астанада өткен баспасөз мәслихатында.
Облыс басшысы айлықты киім-кешек пен тамаққа жұмсайтынын жеткізді. Ақшаны жинап жүргенін де айтып қалды.
Тағы оқыңыз: "Оны кім тексереді?": Архимед Мұхамбетов желіде тараған видеоға түсініктеме берді
"Дәл қазір айлығымды қалай жұмсайтынымды айта алмаймын. Енді, қарапайым адамның шығындары сияқты. Тамақ, киім-кешек, коммуналдық шығындарға көп кететін шығар. Әрине, кез келген адам сияқты ақша жинаймын. Өйткені балаларымның болашағын, ертеңгі күнді ойлаймын. Олар лайықты білім алуы тиіс", - деп атап көрсетті Мұхамбетов.
