ОМБЫ, 5 қараша — Sputnik. Тулар әзірленіп, дастарқан жайылып, концертке дайындық тағы бір мәрте пысықталды. Омбы қаласында XVI Қазақстан-Ресей өңіраралық әріптестік форумына дайындық қыза түскен.
Sputnik Қазақстан тілшісі президенттер кездесетін залға барып, оларға қандай тағам ұсынылатынын білді.
Ас мәзірі
Қабылдау залында мәртебелі меймандарды қарсы алуға дайындық жүріп жатыр. Қара және алтын түстес ыдыс қойылған. Үстел қазақтың үстеліне ұқсас, бірақ жерден біршама жоғары.
Қонақтарға балық, асжапырақ қосылған буратта, ірімшік пен спаржа, бататтан әзірленген крем-сорпа, пісірілген күзгі алма түрінен жасалған сорбет, бекіре тұқымдас балықтан жасалған стейк пен орамжапырақ езбесі және қозы еті ұсынылады.
Тәтті тағам ретінде асқабақ чизкейгі даярланған.
Сусын: минералды су, үй морсы, шырын, шай, кофе, 2017 жылдың құрғақ ақ Шардоне Мантра шарабы және 2017 жылдың құрғақ қызыл Шардоне Мантра шарабы.
7 қараша күні Қазақстан президенті Қасым-Жомарт Тоқаев пен Ресей президенті Владимир Путиннің қатысуымен пленарлық отырыс өтеді. Отырыс қорытындысы бойынша бірқатар құжатқа қол қойылады. Президенттер жоғары технологиялар көрмесін тамашалайды.
