НҰР-СҰЛТАН, 31 қазан – Sputnik. Сыбайлас жемқорлыққа қарсы іс-қимыл агенттігі LRT құрылысына қатысты тың деректерді жариялады, деп хабарлайды Sputnik Қазақстан тілшісі.
Департамент басшысы Сергей Перовтың айтуынша, жеңіл рельсті көлік құрылысы бойынша шығын көлемі артты.
"Тергеу шаралары жалғасуда. Бірқатар сараптама аяқталуға жақын. Шығынның көлемі бірнеше есеге өсіп, 1 миллиард теңгеден асты. Бүгінде осы іске қатысты 6 күдікті анықталып отыр. Олардың ішінде төртеуі - әкімдіктің лауазымды тұлғалары", - деді Перов журналистерге берген сұқбатында.
Тергеуші әкімдік қызметкерлерінің аты-жөнін айтқан жоқ. Бірақ барлығы бұрын істеген адамдар екенін жеткізді.
"Біз бір айдың ішінде барлық сараптаманы аяқтауды жоспарлап отырмыз. Сөйтіп, қылмыстың квалификациясын анықтаймыз. Енді, Astana LRT-ның бұрынғы басшысы Талғат Ардан бой тасалап жүр. Оған Интерпол желісі бойынша іздеу жарияланды. Қалған күдіктілермен жұмыс істеп жатырмыз. Олар қамауға алынған жоқ. Барлығы тергеуге белсенді атсалысып жүр", - деп атап көрсетті Перов.
