НҰР-СҰЛТАН, 24 қазан — Sputnik. Қазақстанның Беларусь еліндегі экс-елшісі Ермұхамет Ертісбаев Александр Лукашенконың Нұрсұлтан Назарбаевтың отставкасы туралы хабарды қалай қабылдағанын айтты.
"Биылғы жылдың 19 наурызында Назарбаевтың президент лауазымынан өз еркімен кетуін Лукашенконың жоғары бағалағанын білемін. Ол да солай жасауы мүмкін бе? Уақыт көрсетеді", - деді Ертісбаев "Время" газетіне берген сұхбатында.
Оның айтуынша, Беларусте әзірге Лукашенкоға тең келетін жетекші жоқ.
Александр Лукашенко Беларусь елін 25 жыл басқарып келеді. Ол президенттікке 1994 жылы сайланған еді.
Ермұхамет Ертісбаев 2017 жылдың қарашасынан 2019 жылдың тамызына дейін Беларусь Республикасында Қазақстанның төтенше және өкілетті елшісі болды. Бұдан бөлек ТМД жарғылық органдарында Қазақстанның тұрақты өкілі қызметін қоса атқарды.
Тағы оқыңыз: Ертісбаев Қытайға қарсы митингілерді кім өршітіп жатқанын болжады
Еске салып өтсек, тәуелсіз республиканы 30 жыл дерлік (1991-2019) басқарған Қазақстанның тұңғыш президенті Нұрсұлтан Назарбаев 19 наурызда халыққа үндеу жариялап, өз еркімен отставкаға кететінін мәлімдеді. Сол күні ол президенттік өкілеттігін тоқтататын жарлыққа қол қойды. Елбасы Қауіпсіздік кеңесінің басшысы және Nur Otan партиясының төрағасы болып қалды.
Александр Лукашенко Қазақстанға 24-25 қазанда ресми сапармен келеді.
