НҰР-СҰЛТАН, 30 қыркүйек – Sputnik. Белгілі ресейлік дипломат Евгений Бажанов Sputnik Қазақстан-ға өзінің ескі досы Қасым-Жомарт Тоқаевтың мемлекет басшысы болатынын осыдан бірнеше жыл бұрын болжаған.
2000-шы жылдардың басында Қасым-Жомарт Тоқаев премьер-министр болды. Ол осы кезде Ресейдің сыртқы істер министрлігінің дипломатиялық академиясында докторлық диссертация қорғаған. Өзінің жоғары лауазымына қарамастан, Тоқаев Мәскеуге сұқбаттасуға барған. Жоғары аттестациялық комиссия мүшелері осындай талап қойған екен.
"Тоқаевқа бес сағат бойы түрлі сұрақ қойылды. Қасым-Жомарт керемет жауап берді. Ол әңгімелесудің бірнеше сағатқа созылғанына қысылған жоқ", - деді Бажанов Sputnik Қазақстан-ға берген эксклюзивтік сұқбатында.
Сұрақ-жауап кезеңі сәтті аяқталған соң, Тоқаев пен Бажанов Қазақстанның Мәскеудегі елшілігінің қабылдауына барған.
"Мен Тоқаевтың ғылыми жетекшісі ретінде сөз сөйледім. Дипломатиялық академияда диссертация қорғағандардың бәрі тамаша карьера жасайтынын (академияның бірқатар түлегі мемлекет басшысы болған) айттым. Қасым-Жомарт Кемелұлы Қазақстанда екінші адам. Ары қарай өсетін мүмкіндік жоқ. Өйткені мемлекет басшысы – қазақ халқының көшбасшысы Нұрсұлтан Назарбаев. Сондықтан Қасым-Жомарт Тоқаевқа Біріккен ұлттар ұйымына бару керек деп айттым", - деп еске алады Бажанов.
Тағы оқыңыз: Ресейлік дипломат Тоқаев қытай тілінің арқасында қандай ерлік жасағанын айтты
Бұл сөздерден кейін үстелде отырғандардың жартысы тұрып кеткен. "Тоқаевтың көмекшісі ол кісілердің бәрі Назарбаевтың қабылдау бөлмесіне хабарласып жатқанын айтқан. Сондықтан Қасым-Жомарттың алдағы карьерасының не болары белгісіз еді. Бұл тілектің ешбір астары болмағанын айтып едім, ешкім тыңдамады", - дейді Бажанов.
Ең қызығы, бұдан кейін Тоқаев расында да Біріккен ұлттар ұйымына жіберілді. Ол БҰҰ еуропалық бөлімшесінің бас хатшысы-жетекшісінің орынбасары болды.
"Бұл кездейсоқтық па, әлде менің тілегімнің қатысы бар ма білмеймін. Бірақ сол тілектен кейін түні бойы ұйықтай алмадым. Өзім білмей, Тоқаевқа зиян келтірдім бе деп уайымдадым", - деді ресейлік дипломат.
Евгений Бажанов пен Қасым-Жомарт Тоқаевтың достығы 40 жыл бойы жалғасып келеді.
