НҰР-СҰЛТАН, 7 шілде — Sputnik. Италияның Неаполь қаласында өтіп жатқан жазғы Универсиада ойындарында Қазақстан қоржынына үшінші медаль түсті. Гимнаст Нариман Құрбанов күміс жүлдегер атанды.
Нариман іріктеу кезеңін үшінші орынмен аяқтаған болатын. Финалда ол 14.700 ұпай жинап, күміске қол жеткізді. Алтын медаль 15.400 ұпаймен топтан қара үзіп кеткен тайпейлік Ли Чи Кайдың еншісінде. Қола жүлдені 14.500 ұпай жинаған жапониялық Кая Казюма иеленді, деп хабарлады Ұлттық олимпиада комитетінің сайты.
Еске сала кетейік, кеше спорттық гимнастикадан көпсайыс бойынша жеңімпаздар мен жүлдегерлер анықталды. Қазақстандық Милад Карими бесінші орынға табан тіреді.
Бұған дейін дзюдошы Ғалымжан Қырықбай алтын алса, Сәрсенкүл Рысбекова стендтік атудан үшінші орынды иеленді.
