НҰР-СҰЛТАН, 10 маусым — Sputnik. Ресейдің Қазақстандағы төтенше және өкілетті елшісі Қасым-Жомарт Тоқаевты сайлаудағы жеңісімен құттықтады.
Тоқаев Ресейдің Қазақстандағы елшісін қабылдады, деп хабарлады Ақорда.
Тағы оқыңыз: Қазақстанның әр өңірі бойынша кандидаттар қанша дауыс жинады?
Алексей Бородавкин Қасым-Жомарт Тоқаевқа кездесуге мүмкіндік бергені үшін ризашылық білдіріп, президент сайлауындағы жеңісіне байланысты Ресей Федерациясының президенті Владимир Путиннің құттықтауын жеткізді.
"Мен сізді дауыс берушілер белсенді қатысқан сайлаудағы айқын жеңісіңізбен құттықтаймын. Бұл – таза жеңіс әрі халықтың сізді Қазақстан президенті ретінде таңдауының айқын дәлелі", – деді Ресей елшісі.
Сондай-ақ, Қазақстан-Ресей қарым-қатынастарын одан әрі тереңдету және екі елдің халықаралық ұйымдар аясындағы ынтымақтастығына қатысты мәселелер талқыланды.
Президент сайлауының қорытындысы
Кезектен тыс президент сайлауында өз таңдауын сайлаушылардың 77,4 проценті жасады.
Тағы оқыңыз: Тоқаевқа қай өңірдің тұрғындары ең көп дауыс бергені белгілі болды
Орталық сайлау комиссиясы кезектен тыс президент сайлауының алдын ала қорытындысын жариялады. Сонымен, Nur Otan партиясы атынан сайлауға түскен Қасым-Жомарт Тоқаев 70,76% дауыс жинап, жеңіске жетті.
Орталық сайлау комиссиясының мәлімдеуінше, 9 маусымда өткен президент сайлауында кандидаттар келесідей дауыс жинаған:
- Қасым-Жомарт Тоқаев - 70,76%;
- Әміржан Қосанов - 16,02%;
- Дания Еспаева - 5,2%;
- Төлеутай Рақымбеков - 3,2%;
- Амангелді Таспихов - 2,07%;
- Жамбыл Ахметбеков -1,82%;
- Сәдібек Түгел - 0,92%.
