НҰР-СҰЛТАН, 3 маусым - Sputnik. Қазақстан президенті Қасым-Жомарт Тоқаев жауапкершілікті түсінетінін, сол себепті Елбасы Нұрсұлтан Назарбаевпен ақылдасуға ұялмайтынын айтты. Тоқаев билік транзитінің "қазақша" тәсілі осындай болатынын атап өтті.
Тағы оқыңыз: Сенат депутаттары Назарбаевқа тағы бір мәртебе берді
"Россия" арнасындағы "Вести недели" бағдарламасына берген сұқбатында Тоқаев жүргізушінің: " Нұрсұлтан Назарбаев сынды көшбасшыдан кейін Қазақстан президенті болу қиын ба?" деген сауалына жауап берді.
"Қиын, бірақ ең бастысы – жауапкершілік. Мемлекеттің тағдыры сенің қолыңда екенін түсу керек", - деді Тоқаев.
Сондай-ақ, ол жауапкершілік болған жерде тәртіп болатынын атап өтті.
"Менде біздің тұңғыш президентіміз, Елбасы Нұрсұлтан Назарбаевтан ақылдасу мүмкіндігі бар. Кеңес сұраудан ұялмаймын. Қазақтарда билік транзиті осылай жүреді деп есептеймін", - деді мемлекет басшысы.
Тағы оқыңыз: "Ұят": Назарбаев ЕАЭО елдеріне ұсыныс айтты
Мемлекетті 30 жыл басқарған Қазақстанның тұңғыш президенті Нұрсұлтан Назарбаев 2019 жылдың 20 наурызында өкілеттігін тоқтатқан болатын.
Бұған дейін сенат төрағасы болған Қасым-Жомарт Тоқаев президент болды.
Президент сайлауы
Қазақстанда кезектен тыс президент сайлауы 9 маусымда өтеді. Мемлекет басшысы лауазымына жеті адам таласады:
- "Ұлт тағдыры" қозғалысы атынан Әміржан Қосанов;
- Қазақстан коммунистік халық партиясы атынан Жамбыл Ахметбеков;
- "Ауыл" партиясы атынан Төлеутай Рақымбеков;
- "Ақ жол" демократиялық партиясы атынан Дания Еспаева;
- Nur Otan партиясы атынан Қасым-Жомарт Тоқаев;
- Кәсіподақтар федерациясы атынан Амангелді Таспихов;
- "Ұлы дала қырандары" қоғамдық бірлестігі атынан Сәдібек Түгел.
