НҰР-СҰЛТАН, 14 мамыр – Sputnik. Кезектен тыс президент сайлауының алдында кандидаттар арасында теледебат өтуі мүмкін. Бұл туралы ақпарат және қоғамдық даму министрі Дәурен Абаев айтты, деп хабарлайды Sputnik Қазақстан тілшісі.
"Менің білуімше, теледебат болады және тікелей эфирде өткізіледі. Кандидаттар өзара пікірталасқа түседі", - деді Абаев үкімет кулуарында.
Айта кетсек, елімізде соңғы рет теледебат осыдан 14 жыл бұрын, 2005 жылдың 17 қарашасында өткен еді. Орталық сайлау комиссиясы "Хабар" агенттігі телеарнасында Қазақстан президенттіне кандидаттар арасында пікірталас ұйымдастырды. Теледебатқа төрт кандидат – Ерасыл Әбілқасымов, Әлихан Байменов, Мэлс Елеусізов және Жармахан Тұяқбай қатысты. 2005 жылдың 4 желтоқсанында өткен кезектен тыс президент сайлауына түскен Қазақстанның сол кездегі президенті Нұрсұлтан Назарбаев пікірталасқа қатысқан жоқ.
Қазақстан президенттігіне кандидаттар
Қазақстанда кезектен тыс президент сайлауы 9 маусымда өтеді. Мемлекет басшысы лауазымына жеті адам таласады:
- Nur Otan партиясы атынан Қасым-Жомарт Тоқаев;
- "Ұлт тағдыры" қозғалысы атынан Әміржан Қосанов;
- Қазақстан коммунистік халық партиясы атынан Жамбыл Ахметбеков;
- "Ауыл" партиясы атынан Төлеутай Рақымбеков;
- "Ақ жол" демократиялық партиясы атынан Дания Еспаева;
- Кәсіподақтар федерациясы атынан Амангелді Таспихов;
- "Ұлы дала қырандары" қоғамдық бірлестігі атынан Сәдібек Түгел.
