НҰР-СҰЛТАН, 15 сәуір – Sputnik. Білім және ғылым министрлігі мектеп директорларының бір орында ұзақ отырмай, ауысып отырғанын құптайды. Бұл туралы ведомство басшысы Күләш Шәмшидинова айтты, деп хабарлайды Sputnik Қазақстан тілшісі.
Үкімет үйінде өткен баспасөз мәслихатында журналистер білім және ғылым министрінен мектеп директорларына қатысты сұрақ қойды.
Шәмшидинова қазір білім саласында көптеген дүние цифрлық жүйеге көшіп жатқанын алға тартты.
"Білесіздер, бұрын Шымкент пен Түркістан облысында мұғалімдердің бәрін "блатпен" алады деп көп айтатын. Қазір бәрі электронды түрде. Сол жерде тест тапсырады, кейін кім қабылданды, кім қабылданған жоқ, соның қорытындысы шығады. Болашақта бәріміз осыған келеміз", - деді министр.
Ал директорлардың ауысып отырғанын білім және ғылым министрлігі де қолдайды.
"Олардың ауысып тұрғаны маған қатты ұнайды. Бірақ, біз, ең алдымен, қоғаммен ақылдасуымыз керек, кейін қараймыз. Қазір мектеп директорлары босаған орындарға конкурс арқылы өтеді. Ал жалпы бұл дұрыс болар еді", - деді Шәмшидинова.
