НҰР-СҰЛТАН, 29 наурыз – Sputnik. Қазақстан президенті Қасым-Жомарт Тоқаев Леңгір қаласындағы көп пәтерлі тұрғын үйдің мәселесін шешуді тапсырды, деп хабарлайды Sputnik Қазақстан.
"Премьер-министр мен Түркістан облысының әкіміне Леңгірдегі көппәтерлі тұрғын үйдің өткір мәселесін шұғыл түрде шешуді тапсырдым", - деп жазды Тоқаев твиттердегі парақшасында.
Белгілі болғандай, Түркістан облысы Леңгір қаласының тұрғындары көп жылдан бері кәріз жүйесінің зардабын тартып келеді. Көп пәтерлі баспананың тұрғындары бір жыл бұрын да жертөлені нәжіс басып кететінін айтып шағымданған көрінеді. Сол кезде аудан басшылығы кәріз жүйесін жөндеуге уәде бергенмен, сол күйі орындамаған, деп хабарлайды 31 арна.
Ал аудан әкімдігі болса, кәріз жүйесінде еш ақау жоқ деп сендіріп отыр. Кәрізді қоқысқа толтырып тастайтын тұрғындардың өздері дейді.
Жалға берілетін 60 пәтерлі тұрғын үйде, негізінен, көпбалалы отбасылар мен мүгедектер тұрады екен.
