НҰР-СҰЛТАН, 25 наурыз – Sputnik. Қазақ боксшысы Садриддин Ахмедов кәсіби рингтегі сегізінші жекпе-жегін өткізді, деп хабарлайды Sports.kz.
Бұл кездесу Алматыдағы кәсіпқой бокс кешінің аясында өтті. Жиырма бір жастағы қазақ жігітінің қарсыласы индонезиядық Джон Руба (17-5-1, 9 КО) еді. Бұл жекпе-жекте мерейі үстем болған былғары қолғап шебері орта салмақ дәрежесінде WBC Asia чемпионы атағын қанжығасына байлайды.
Он раундтан тұратын жекпе-жек соңында төрешілер бір ауыздан Ахмедовты жеңімпаз деп атады. Сөйтіп, Садриддин кәсіпқой бокста сегізінші рет жеңіске жетіп, WBC Asia белбеуін иеленді.
Айта кетсек, бұл қазақ жігітінің соңғы айдағы екінші чемпиондық титулы — бұған дейін ол осы ұйымның "жастар" чемпионы атағын алған болатын.
