АСТАНА, 20 наурыз – Sputnik. Елордалық мәслихат депутаттары Астана қаласының атауын "Нұрсұлтан" деп өзгерту туралы ұсынысты қолдады, деп хабарлайды Sputnik Қазақстан тілшісі.
"Бүгін президент Қасым-Жомарт Тоқаев елордамыздың атын оның бас сәулетшісі, Қазақстанның тұңғыш президенті - Елбасы Нұрсұлтан Әбішұлы Назарбаевтың атымен атап, мәңгілік тарихқа қалдыруды ұсынды", - деді Астана қаласының әкімі Бақыт Сұлтанов елорда мәслихатының 46-шы сессиясында.
Сонымен қатар, ол парламент палаталарының бірлескен отырысында депутаттар Астана қаласының атауын Нұрсұлтан деп өзгерту туралы заң жобасын қабылдағанын атап өтті.
"Астана қаласының әкімдігі Қазақстанның тұңғыш президенті - Елбасы Нұрсұлтан Назарбаевтың есімін мәңгі есте сақтауға бағытталған бастаманы қолдайды. Әлеуметтік желілерден, жұмыс топтарынан хаттар келіп жатыр. Олардың бірінде қаланың жаңа атауы жаңа жеңістерге жетелейді деп жазылған", - деді қала әкімі.
Сонымен, мәслихат депутаттары Астана қаласын Нұрсұлтан деп атау туралы ұсынысты бірауыздан қолдады.
Бұдан бөлек, мәслихат қала атауын "Нұр-Сұлтан" деп жазу туралы ұсынысты қабылдады. Енді бұл мәселені Қазақстан үкіметі жанындағы республикалық ономостикалық комиссия қарайды. Одан өтсе, үкіметтің қарауына жіберіледі.
