АСТАНА, 6 ақпан — Sputnik. Қазақстандық белгілі актриса қаза тапқан жол апатына күдікті жүргізушіге қатысты қылмыстық істің тоқтатылғаны туралы қауесетті Алматының полиция департаменті жоққа шығарды.
Алматыда 2018 жылдың 29 желтоқсанында Абай – Сейфуллин даңғылдарының қиылысында жол апаты болды. Қайғылы оқиға салдарынан үш адам қаза тапқан, олардың бірі – актриса Шолпан Елгезекова. Желіде күдікті жүргізуші Ілияс Кар бостандыққа шықты деген хабар тарады.
"Карға қатысты қылмыстық іс қазір сот қарауына жіберілген. Ол ұсталғаннан бері қамауда отыр", - деп мәлімет берді полиция департаменті.
Полицейлер қазақстандықтардан жалған ақпарат таратпауды өтінді.
Бұдан бұрын оқиға куәгерлері хабарлағандай, Алматыда желтоқсанда болған жол апатына Gelandewagen көлігінің мас жүргізушісі айыпты. Көлік апатының видеосы желіде жарияланған. Кадрларда жүргізуші қатты жылдамдықпен бағдаршамның қызыл жарығында қиылыстан өтіп, екінші көлікке соғылды.
