АСТАНА, 23 қаңтар – Sputnik. Мәжіліс депутаты Азат Перуашев Қазақстанның атауын өзгертуді ұсынды, деп хабарлайды Sputnik Қазақстан тілшісі.
"Өткен жылы Әзербайжан Республикасы өзінің 100-жылдығын атап өтті, биыл Ресей президентінің ресми жарлығымен "Алашорданың" құрдасы — Башқұрт Республикасы 100 жылдығын тойлайды. Осыны ескере отырып, "Ақ жол" демократиялық партиясы Қазақ Республикасының 100 жылдығына мемлекеттік дәрежеде көңіл бөліп, лайықты деңгейде атап өтуді ұсынады. Ол үшін ғылыми конференциялар ұйымдастырып, сол шешімнің қабылдауына себепкер болған қайраткерлердің еңбектерін жариялап, олардың есімдерін көшелер мен мекемелерге беріп, пошта маркілерін, естелік монеталар шығаруды сұраймыз", — деді ол депутаттық сауалында.
"Екіншіден, "Қазақ Республикасы" атауын қайтару мәселесін қарастыруды ұсынамыз. Негізінде, мұндай бастаманы 5 жыл бұрын "Мәңгілік Ел" тұжырымдамасын талқылау барысындан Нұрсұлтан Назарбаев көтерген еді. Елбасының ұстанымын жүзеге асыратын уақыт келді деп ойлаймын.
Қараны – қара, ақты – ақ, қазақты – қазақ деп өз атымен атауымыз керек. Республикаға тоталитарлық биліктің өзі мойындаған байырғы "Қазақ" деген атауын қайтару тарихи әділдікті орнатып қана қоймай, біздегі әртүрлі ұлт өкілінің бірлігі мен достығының нығаюына әсер етеді", — деді Перуашев.
Оның айтуынша, "Қазақ Республикасы" атауы Қазақстан атауымен қатар ресми түрде қолданылуы қажет.
Тағы оқыңыз: Қарағандыда 18 көшенің атауын өзгерту талқыланған жиында жанжал шықты
