АЛМАТЫ, 10 қаңтар — Sputnik. Кәмелеттік жасқа толмағандар ісі бойынша инспектор Азамат Нұрпейісов Денис Теннің өлімі туралы сот процесінде басты куәгер болды.
"19 шілде күні біз Құрманғазы көшесінің бойымен батысқа қарай қозғалып бара жаттық. Абылай хан көшесінен өткен кезде жүгіріп бара жатқан сырт келбеті азиат үш жігітті көрдік. Арасында қара футболка киген біреуі Бәйсейітова көшесінің бойымен жаяу жүргіншілер жолына жетпей Toyota Camry көлігінің алдынан жүгіріп шығып, автомобильдің капотына құлады. Ақ футболка киген екіншісі жаттығу алаңына қарай жүгіріп, үшіншісі оны қуып жетпек болды", — деді Нұрпейісов.
Тергеу амалдары барысында автомобильдің алдынан Арман Құдайбергеновтің жүгіріп шыққаны белгілі болды.
"Әріптесім екеуіміз олар ойнап жүр екен деп ойладық. Көлікті тоқтатып, жігіттерге қарай жүгірдім. Сол жерде ақ футболкадағы жігіттің әрең тұрып, кейін құлағанын көрдім. Оның аяғынан қанның қалай тамшылап жатқанын байқадым. Кейін жанымызға адамдар келе бастады. Оларға жедел жәрдем шақырып, алғашқы көмек көрсету керектігін айттым", — деп еске алды полицей қайғылы оқиға болған күнді.
Тағы оқыңыз: Денис Теннің сыныптасы өзінен күдіктенбеуді сұрады
Нұрпейісов әріптестеріне рация арқылы бағыттама беріп, қашып бара жатқандардың соңынан жүгіреді. Алайда олардың қай көшеге бұрылғанын көрмегендіктен, көз жазып қалады. Панфилов көшесіне жүгіріп шыққаннан кейін полицей жаяу жүргіншілерден жігіттер туралы сұрағанында тұрғындар олардың Назарбаев көшесіне қарай кеткенін айтқан.
Марқұм мәнерлеп сырғанаушының анасы Оксана Тен полицейдің сөзін тыңдағаннан кейін одан неге қансырап жатқан адамды көріп тұрып өзі жедел жәрдем шақырмағаны туралы сұрады.
Азамат Нұрпейісов жарақаты тым ауыр деп ойламағанын айтты.
"Мен үшін сол сәтте күдіктілердің басқа адамдарды жарақаттамауы маңызды болды", — деді полицей.
Сондай-ақ, Нұрпейісов дәл сол сәтте қалтасында ұялы телефонның болмағанын, әріптестеріне рация арқылы хабар бергенін айтты.
Денис Теннің қазасы
Қазақстандық мәнерлеп сырғанаушы Денис Тен 2018 жылдың 19 шілдесінде 25 жасында көз жұмды. Көлігінің айнасын ұрлағандарды тоқтатпақ болған спортшыны ұрылар сан тұсынан пышақпен жарақаттады.
Тағы оқыңыз: Денис Теннің отбасының адвокаты күтпеген мәлімдеме жасады
Арман Құдайбергенов, Нұралы Қиясов және Жанар Толыбаева кісі өлтірді деген күдікке ілінді. Ер адамдар тонап, кісі өлтіргені, ал әйел қылмыс туралы хабарламағаны үшін айыпталып отыр.
Сотта марқұм мәнерлеп сырғанаушының анасы Оксана Тен ұлының тапсырыспен өлтірілгеніне сенімді екенін айтты. Сондай-ақ, сотта оқиға болған жерге бірінші болып жеткен екі полицей куәгер болды.
