АСТАНА, 27 желтоқсан — Sputnik. АҚШ-тың Калифорниялық медициналық университетінің ғалымдары терінің қартаю механизмін анықтады. Олар TGF-beta молекулаларының белсенділігін бәсеңдетіп, тері жасушаларының қызметін қалпына келтірді. Жұмыстың нәтижесі Immunity журналында жарияланған.
Терінің фибробласттары — біріктіруші ұлпаның жасушалары. Олар адам терісін инфекциялардан қорғап, әжімнен сақтайтын май бөліп шығарады.
Зерттеушілер анықтағандай, жаңа туған нәрестенің терісінде бұл фибробласттардың мөлшері өте көп болады. Алайда жас ұлғайған сайын олар азайып, инфекциядан қорғанысы әлсірей түседі екен. Ал бұған себеп TGF-beta деп аталатын нәруыз болып шықты, ол ересектердің фибробласттарына әсер етіп, май мен кателицидиннің бөлінуіне кедергі жасайды.
Ғалымдар тышқандардың фибробласттарындағы TGF-beta молекуласын баяулату арқылы тәжірибе жасап көреді. Сол кезде майдың түзілуі мен микробқа қарсы белсенділік қалпына келген.
