АСТАНА, 17 желтоқсан — Sputnik. Қазақстанның бас шыршасы ЭКСПО-2017 көрмесінің аумағында жағылады. Шырша жағу рәсімі 18 желтоқсанда сағат 18:30-да басталады.
Мерекелік шара танымал әртістердің қатысуымен өтетін концерттік бағдарламаға ұласады. ЭКСПО көрмесінің аумағында кішкентай көрермендердің көңілін аниматорлар мен алып қуыршақтар көтеретін болады, деп хабарлайды елорда әкімдігінің ресми сайты.
Ойын-сауық бағдарламасын астаналықтар мен қала қонақтары сағат 18:30-дан бастап тамашалай алады. Шыршаның шамдарын жағу рәсімі сағат 19:00-ге белгіленіп отыр.
Бұдан бөлек, елорда тұрғындары мерекелік отшашудың куәгері бола алады. Бас шыршаның шамдарын жағу арқылы қысқы және отбасылық демалысқа арналған көптеген қызмет көрсететін ойын-сауық түрлерінің бірыңғай интерактивті #AstanaWinterland алаңы іске қосылады.
Шыршаның биіктігі – 25 метр. Бас шыршамен бірге, елорданың түкпір-түкпіріндегі барлық жаңа жылдық шыршалар жағылады.
