АСТАНА, 6 қазан — Sputnik. Ресей Федерациясы Нукутск ауданы Хадахан ауылында 28 жастағы алты баланың әкесі кенжесін бұтына жіберіп қойғаны үшін ұрып өлтірді. Бұл туралы 360tv.ru сайты жазды.
Тергеу жұмыстары барысында 2018 жылдың 24 наурызында көпбалалы ер адам 4 жасар ұлын аяусыз ұрып-соққаны белгілі болды. Ер адам ұлын қолмен ұрып қана қоймай, белдікпен сабаған. Өмірі үшін маңызды кеуде, бас және бет тұсынан соққы жасаған.
Ауыр жарақаттар салдарынан бүлдіршін сол сәтте өлген. Бұл кезде үйде ер адамның әйелі мен тағы кәмелеттік жасқа толмаған бес бала болған. Әйелі араша түспек болғанын айтқан. Алайда отағасы одан баласын тәрбиелеуге кедергі жасамауды сұраған.
Сот жүргізген психологиялық, психиатриялық сараптамалар нәтижесінде ер адамның бұрын-соңды қандай да бір созылмалы жүйке ауруына шалдықпағаны белгілі болды. Яғни 28 жастағы азаматтың ақыл-есі дұрыс.
Иркутск облыстық сотының шешімімен 28 жастағы Хадахан ауылының тұрғыны 13 жылға бас бостандығынан айырылды.
