АСТАНА, 7 қыркүйек — Sputnik. Қарағандыда жас жұбайлар неке қию рәсімін ұзақ уақыт есте сақтайтын болды, өйткені оларды Қазақстан президенті Нұрсұлтан Назарбаевтың өзі құттықтады.
Қарағанды облысына жұмыс сапары барысында Елбасы жас жұбайлардың неке қию рәсімі өтіп жатқан жаңа "Ақ сарай" салтанат сарайына барды, деп хабарлады Ақорданың баспасөз қызметі.
Қазақстан президенті жас отау иелерін құттықтап, оларға бақыт, шаңырақтарына береке тіледі.
"Ертең Қазақстанда Отбасы күні аталып өтеді. Көп адам үшін бақыт дегеніміз – отбасы және балалары. Сіздерді өмірлеріңіздегі ең жарқын оқиғамен құттықтаймын!", – деді Нұрсұлтан Назарбаев.
Мемлекет басшысы отбасы институтын нығайтудың және еліміздің жас ұрпағын тәрбиелеудің маңыздылығын атап өтті.
Нұрсұлтан Назарбаев отау құрып, дүркіретіп той өткізуден бас тартты
Жас шаңырақ иелері Қазақстан президентіне жас отбасыларды қолдау бағытында жүргізіліп жатқан саясаты үшін, соның ішінде "7-20-25" бағдарламасы үшін алғыс білдірді.
Жаңа салтанат сарайы "Рухани жаңғыру" бағдарламасы аясында жеке кәсіпкердің қаражатына салынған.
