ШЫМКЕНТ, 1 тамыз — Sputnik. Вагондардың рельстен шығып кетуіне байланысты кешіккен Шымкент – Астана пойызының жолаушылары перронда түнеуге мәжбүр болды.
31 шілде күні таңертең Жамбыл облысында жүк көлігі вагондары рельстен шығып кетіп, салдарынан бес жолаушылар пойызы кешіккен.
Өңірлік otyrar.kz басылымына сілтеме жасап Sputnik хабарлағандай, жолаушылар кешкі сағат алтыда елордаға аттануы тиіс болатын, алайда пойыздың рельстен шығуы жоспардың күл-талқанын шығарыпты. Адамдар пойыздың қашан аттанатынын білмей, басым көпшілігі вокзалда күтуге шешім қабылдаған.
Жергілікті саудагерлер бұл жайтты құр жібермей, азық-түлік бағасын көтере қойды. Нан қымбаттап, ауыз су бағасы екі есе артқан. Ал тез пісірілетін кеспе үш-төрт есе артық бағамен сатылып, құны 400 теңгеге жетті. Тіпті әжетханаға бару үшін де жолаушылар ақша төлеуге мәжбүр болыпты. "Шымкент" станциясының басшысы араласқаннан кейін ғана әжетхана тегін болған.
Жолаушыларға күту залында, "ана мен бала" бөлмесінде, перрондағы орындықтарға, көгалға түнеуге тура келді.
Кейбіреулерге ақшасын қайтарып беріпті – билет құны жеті мың теңгеден астам болса да, адамдарға бес мыңнан қайтарылды. Ал олардың көпшілігі билетті алып-сатарлардан 17 мен 22 мың теңге аралығында сатып алған екен.
Тағы оқыңыз: Қазақстанда пойыз билетін сататын жаңа сайт ашылды
