АСТАНА, 19 шілде — Sputnik. Астанада қатты дауыл салдарынан аударылып, 5 баланы жазым ете жаздаған батуттың иесі жауапқа тартылады. Төтенше оқиғаға қатысты қозғалған қылмыстық іс сотта қаралмақ, деп хабарлайды КТК.
Сот алдына екі адам келеді. Бірі – балалар секіріп ойнайтын батуттың иесі. Екінші айыпталушының кім екені әзірге айтылған жоқ.
Оларға тағылған айыптар: "Қауіпсіздік талаптарына сай келмейтін қызмет түрін ұсыну" және "кішкентай ұл-қыздардың денсаулығына абайсызда зиян келтіру". Сот отырысы келесі бейсенбіде өтеді.
Естеріңізге сала кетсек, екі ай бұрын Астанадағы "Жаннұр" сауда орталығының алдындағы батутты жел ұшырып, 5 бала ауруханаға түскен еді. Бүлдіршіндердің бірі жансақтау бөліміне жатқызылған.
Астанада жел ұшырған батуттан зардап шеккен балалардың хәлі қалай?
Сотталушылар кінәлі деп танылса, 12 миллион теңгеге дейін айыппұл төлейді немесе 5 жылға дейін бас бостандығынан айырылуы мүмкін.
