ПЕТРОПАВЛ, 18 шілде – Sputnik. Солтүстік Қазақстан облысында 60 жастағы трактор жүргізушісі бетон плиталарының астында қысылып қалды.
Төтенше жағдай Тайынша ауданының орталығы Тайынша қаласында болған. Бидай қоймасында шатырдың бетон тіреуіші құлап, онымен бірге екі темір-бетон плитасы трактордың үстіне опырылып түседі. Салдарынан жүргізуші кабинаның төбесі мен рөлдің арасында қысылып қалған.
Трактор жүргізушісі бетонның астында қысылып қалды
© Photo : СҚО ТЖД
"Мұндай жағдайда шапшаң қимылдау керек. Оқиға орнына келген құтқарушыларға санаулы минутта ер адамды алып шығу қажет болды. Өйткені трактордың кабинасында қансырап жатқан адамның өмірі осыған байланысты", — деді облыстық төтенше жағдайлар департаментіндегілер.
Құтқарушылар өте мұқият қимылдап, темірді кесіп, шошып қалған жүргізушіні алып шығады.
Зардап шеккен жүргізушіге көмек көрсеткен құтқарушылар
© Photo : СҚО ТЖД
Зардап шеккен адамға жедел жәрдем дәрігерлері оқиға орнында көмек көрсетеді. Одан кейін тұрғын дереу Тайынша аудандық ауруханасының жансақтау бөліміне жеткізіледі. Қазіргі уақытта көп жерінен жарақат алған ер адам дәрігерлердің бақылуында, оның жағдайы бірқалыпты.
