АСТАНА, 11 шілде — Sputnik. Америкалық Дэниэл Джейкобс пен украиналық Сергея Деревянченконың менеджері Кит Коннолли боксшылардың IBF титулы үшін өткізетін жекпе-жегіне қатысты пікір білдірді, деп хабарлады Sports.kz.
Спортшылар бұрын Геннадий Головкинге тиесілі болған белбеу үшін қазан немесе қарашада Нью-Йорк қаласында айқасады. Сонымен қатар Коннолли жаңа чемпион алдағы уақытта Головкин мен Сауль "Канело" Альварес арасындағы жекпе-жектің жеңімпазына қарсылас болуы мүмкін екенін жоққа шығармайды.
"Дэнни мен Сергей арасындағы мәміле аяқталғанына қуаныштымын. Олар бір-бірімен жұдырықтасқысы келмейтіні жайлы көп сөз болғанын білемін. Алайда чемпиондық титул бәске тігілетіндіктен екеуінің де мұндай жекпе-жектен бас тартқысы келмей отыр. Қос спортшы да – өз ісінің шебері, бұл жылдың ең үздік жекпе-жектерінің бірі болуы мүмкін деп ойлаймын. Жеңімпаз "Канело" — GGG айқасының жеңімпазымен кездесуге кезекке тұруы тиіс болады", — деп ESPN Конноллидің сөзінен үзінді келтірді.
