АСТАНА, 3 мамыр — Sputnik. Таяуда Өскеменге Қытайдың карантиндік қызмет өкілдері келіп қайтты. Олар жергілікті өнім өндіруші кәсіпкерлердің жұмысымен танысты, деп жазды altaynews.kz.
Қытай тарапы ең алдымен ШҚО балына қызығушылық танытып отыр екен. Жергілікті Кәсіпкерлер палатасында болған кездесуде шығыстағы көршілеріміз айтулы омарташыларды экспортерлер тізіміне алатындарын айтып, өздерінің бірнеше сұрақтарын да қойды.
"Техникалық талаптар қалай орындалады, санитарлық нормалар қандай деңгейде? Өнімнің қауіпсіздігін бақылау жүйесінің қалай жұмыс істейтінін білгіміз келеді. Өнімді сертификациялау жұмыстары қалай жүргізіледі, балдың сапасы қалай бағаланады? Осыны білгіміз келеді",-дейді олар.
ШҚО Кәсіпкерлер палатасы баспасөз қызметінің мәлімдеуінше, қытай тарапы біздің 10 экспортеріміздің өнімін сатып алуға дайын екенін айтқан. Оның ішінде алты бал, үш балық өнімі және бір ет өндіретін кәсіпкермен келісімшарт жасаспақ. Соныман қатар, қытайлық делегация "Пасека" ШҚ (бал), "Төре Тоғам" ЖШС (балық) сияқты өнім өндіретін кәсіпкерлердің жұмыстарымен танысты.
