АСТАНА, 30 сәуір – Sputnik. Түрікменстан билігі әйелдердің сыртқы киімі мен бет бояуына қатысты жаңа талаптар енгізді, деп хабарлады centralasian.org.
Азаттықтың түрікмен қызметі (Азатлык) дереккөзі мен тәуелсіз ақпарат көздерінің хабарлауынша, киімге қатысты жаңа талаптар ең бірінші мемлекеттік мекеме қызметкерлері мен студенттерге арналған.
Бұдан былай әйелдердің сыртқы киімі денесін түгелімен жауып тұруы керек, тек ғана шұлығы мен қолының саусақтары көрініп тұруы шарт. Осының алдында ғана "Түрікменстан хроникасы" басылымы жоғары оқу орнында дәріс беретін оқытушыларға дәстүрлі көйлек пен балақ киюді талап еткенін жазған.
"Шенеуніктер тарихи және мәдени дәстүрді ұмытпай, ұлттық түбірімізден ажырап кетпеуіміз керек деді. Ер адамдарға жұмысқа қара-қоңыр түсті костюм, ақ көйлек, міндетті түрде галстук тағуды міндеттесе, әйелдерге "Янлы" деп аталатын дәстүрлі көйлек, сары өрнектері бар "Ойме" және көйлектің ішінен киетін шалбар киюді міндеттеді. Әйелдер сонымен бірге тырнақтарын боямай, жасанды кірпік, қас жапсырмай, шашын табиғи түске бояуы керек", — деп хабарлаған "Түрікменстан хроникасы" басылымы.
