АСТАНА, 11 сәуір — Sputnik. БАҚ-та криптовалюта мен онымен байланысты мәмілелер жарнамасына тыйым салған дұрыс, деп санайды ұлттық банк төрағасы Данияр Ақышев.
"Қаржы және төлем ұйымдарына криптовалютамен байланысты операциялар мен мәмілелерді жүргізуге тыйым салу жоспарланып отыр. БАҚ-та криптовалюта мен онымен байланысты мәмілелерді жарнамалауға тыйым салған дұрыс. Сіздер білесіздер, мұны Google, Facebook, Telegram және басқа да жаһандық технологиялық компаниялар бастап кетті", — деді Ақышев мәжіліс кулуарында.
Ол майнингке қатысты, криптовалюта эмиссиясы мен оны таратуға тыйым салу туралы сөз болып отырғанын айтты.
"Майнер өз қызметі үшін сыйақы ретінде алатын криптовалюталар Қазақстан аумағында актив, қаржы құралы немесе құндылық болып саналмайды", — деді ұлттық банк басшысы.
