АСТАНА, 5 сәуір — Sputnik. "Қазақстан Ақтөбе" арнасының жүргізушісі лифт құлаған кезде ауыр жарақат алып, оқиға орнында қаза тапты, деп хабарлайды Sputnik Қазақстан тілшісі.
Лифтте қаза тапқан әйелмен бірге үш жасар қызы да болған, бірақ ол зардап шеккен жоқ.
Sputnik Қазақстан агенттігіне берген сұхбатында Ақтөбе облысы ІІД баспасөз қызметінің басшысы Ерболат Сарқұлов оқиғаның 4 сәуірде болғанын хабарлады.
"Кезекші бөлімге түскен хабар бойынша, 12-ші шағын аудандағы үйлердің бірінде лифт ішінен әйел адамның денесі табылған", — деп мәлімет берді Сарқұлов.
Оның айтуынша, қазір ҚР ҚК 278-бабы 2-тармағы бойынша сотқа дейінгі тергеу амалдары жүргізіліп жатыр, бірқатар сараптама тағайындалған.
