АСТАНА, 3 сәуір — Sputnik. Аягөз – Семей рейсін орындаған жолаушылар автобусы трассада түгі қалмай өртеніп кетті, деп жазды ustinka.kz.
Шығыс Қазақстан ішкі істер департаментінің мәліметінше, сәуірдің бірінен екісіне қараған түні болған. Автобус бұзылып қалғаннан кейін жолаушылар басқа көлікпен Семейге жеткізілген.
"Жүргізушілер автобусты жөндеп, Аягөзге қайтып бара жатқанда көліктен өрт шыққан", — деп нақтылады ведомствоның баспасөз қызметі.
Өрт сөндірушілер келгенше автобус толығымен жанып кетті. Зардап шеккендер мен құрбан болғандар жоқ. Өрттің себебі анықталып жатыр.
Естеріңізге салайық, 18 қаңтарда Ақтөбе облысының Ырғыз ауданында Самара — Шымкент тасжолында автобус өртеніп, 52 адам қаза болды, барлығы Өзбекстан азаматы.
