АСТАНА, 8 наурыз — Sputnik. Ақмола облысында мемлекеттік мекеме басшысы қол жұмсағаны үшін кінәлі деп танылды. Бұл туралы облыстық соттың баспасөз қызметі хабарлады.
Оқиға 1 ақпанда болған. Зардап шеккен әйелдің айтуынша, кабинетіне персоналды басқару қызметінің маманы келіп, тәртіптік жауапкершілікке тарту туралы шешіммен таныстырған. Ол бұл шешіммен келіспей, ревизиялық комиссия төрағасының кабинетіне барған, басшы орнынан ұшып тұрып, оны жұлқылап, сол жақ кеудесін тырнап алған.
5 ақпандағы сот-медициналық сараптаманың қорытындысы бойынша зардап шегушіге жеңіл дене жарақаты келтірілгені белгілі болды. Сарапшы жарақат қолдың тырнағымен салынғанын растады.
Сот төрағаның міндетін атқарушыны ҚР Әкімшілік құқық бұзушылық туралы кодексінің 73-1 бабы 1- бөлігі бойынша кінәлі деп тапты. Жанжалқой мемлекеттік қызметкерге 25 мың 253 теңге айыппұл салынды.
