АСТАНА, 28 ақпан — Sputnik. Белгілі әнші Бауыржан Исаев 20-21 ақпан күндері Атыраудағы М. Өтемісұлы атындағы академиялық драма театрда концерт қойды. Оның келетіні халыққа алдын ала хабарланбағандықтан, бірінші күні залда тек тоғыз ғана көрермен болды, деп жазды Ақ Жайық газеті.
Әншінің концертіне билеттер мекемелерге сатылған, сол себепті қалада хабарландырулар ілінбепті.
"Не деген көпсіздер!" деп сөзін бастаған Бауыржан Исаев 1998 жылы Оңтүстік Қазақстан облысы Түлкібас ауданындағы концертінде небары үш адам жиналғанына қарамастан концерт өткізгенін есіне алды. "Оның қасында тоғыз адам әжептәуір ғой" деп әзілдеп те қойды. Жалпы, концерт бойы әнімен ғана емес, әзілімен де көрермен көңілін көтеріп отырды. Өзі туралы да айтқан. 1979 жылы Шымкент облысында туған әнші кіші жүздің тама руынан екен. Бүгінде үш қыздың әкесі", — деп жазды басылым.
Келесі күні концерт болардың алдында театр залында әнші сұхбат берді.
Өзінің айтуынша, мінезі ауырлау болғандықтан продюсерсіз жұмыс істеп жүр екен.
"Әкімшілерге менімен жұмыс істеу кішкене қиындық тудырады. Сол себепті мен әкімшінің, ұйымдастырушылардың жұмыстарын өзім атқарамын", — дейді ол.
Әнші соңғы кездері теледидардан не себепті көрінбей кеткенін де түсіндіріп өтті.