АСТАНА, 23 ақпан — Sputnik. Астана әкімі Әсет Исекешев мемлекеттік тегін медициналық көмек аясында науқастарға берілетін дәрі-дәрмекті ұрлайтын медициналық қызметкерлерді жауапқа тартпақ, деп хабарлайды Sputnik Қазақстан тілшісі.
Денсаулық сақтау басқармасының коллегиялық кеңесі отырысында Елжан Біртанов бас дәрігерлердің назарын "дәрі-дәрмектердің ұрлану" жайтына аударды.
Министрдің айтуынша, тегін дәрі-дәрмек алу үшін базаға тіркелген азаматтар шын мәнісінде көмекке қол жеткізе алмай отыр.
"Біз кездейсоқ 500 адамға хабарласып, олардың дәрі-дәрмек алмағанын анықтадық. Сонда қалай? Бұл дәрі қайда кетіп жатыр? Қазір тиісті тексеру жүргізіп жатырмыз", — деді денсаулық сақтау министрі.
Елорда басшысы Әсет Исекешев бұл ақпарат расталса, істі құқық қорғау органдары қарайтынын мәлімдеді.
