АСТАНА, 19 қаңтар – Sputnik. Ерлі-зайыпты интернет арқылы 6 миллион теңгеге бүйрек сатпақшы болған, деп хабарлады Астана сотының баспасөз қызметі.
"2017 жылы Астана қаласының тұрғыны күйеуінің бір бүйрегін 6 миллион теңгеге сату мақсатында ғаламтордағы сайттарға арнайы хабарлама берген. Астана қаласы Сарыарқа ауданының №2 аудандық сотында ерлі-зайыпты Е. қатысты қылмыстық іс қаралды", — деп жазылған хабарламада.
Соттың мәліметінше, олар тірі органды сату бойынша заңсыз шарт жасасып, сатып алушыдан 6 000 000 теңге алған.
Сот үкімімен ерлі-зайыпты ҚР ҚК 24-бабының 3-бөлігі – 166-бабы 2-бөлігінің 4-тармағы бойынша кінәлі деп танылып, оларға шартты түрде 5 жылға бас бостандығынан айыру жазасы тағайындалды.
Үкім заңды күшіне енген жоқ.
