АСТАНА, 10 қаңтар — Sputnik. Қазақстанның сыртқы істер министрлігі жоғары деңгейдегі корейаралық келіссөздерге қатысты мәлімдеме жасады.
Қазақстан Республикасы 2018 жылдың 9 қаңтарында өткен Корея Республикасы мен Корея Халық Демократиялық Республикасы арасындағы жоғары деңгейдегі келіссөздерді құптайды және екіжақты қарым-қатынастарды жақсарту үшін екі елдің күш-жігерін жоғары бағалайды.
Корея Республикасы мен Солтүстік Корея арасындағы белсенді диалог Корей түбегінің денуклеаризация мәселесіне оң әсерін тигізеді деген сенімдеміз.
Қазақстан Корей түбегіндегі жағдайдың диалог пен келіссөздер арқылы реттелуін дәйекті қолдайды.
БҰҰ Қауіпсіздік Кеңесінің төрағасы, сондай-ақ өз еркімен ядролық қарудан бас тартқан мемлекет ретінде Қазақстан барлық мүдделі тарапты Солтүстік Кореяның ядролық және баллистикалық бағдарламалары бойынша келіссөздер үдерісін жедел қайта қозғауға шақырады.
