АСТАНА, 5 қаңтар — Sputnik. Шымкентте әуежайда тұрақта тұрған екі ұшақ қатты желден қозғалып, бір-біріне соғылды, деп хабарлайды инвестиция және даму министрлігі азаматтық авиация комитеті.
Оқиға 2017 жылы 27 желтоқсанда болып, салдарынан Training center Part FCL компаниясына тиесілі Cessna-172 ұшақтары бүлінген.
"Ұшақтардың бағыттау рөлі мен қанатына зақым келді. Радиограммаға сәйкес, бұл жайтқа қатты жел кезінде тұрақта тұрған ұшақтардың бір-біріне тым жақын орналасуы себеп болған", — деп атап өтті комитет.
Айта кетейік, Training center Part FCL оқу-жаттығу орталығы акциясының 9% Азаматтық авиация академиясына тиесілі.
